حكّام الجمهوريّة
لو طبقّنا النسبيّة
بحكّام الجمهوريّة
كان بيطلع صنف رجال
بنسبة واحد بالميّة
_____________
الحاكم عَ بلادو ما حَنّ
ونفسو بيعشق بالأوَل
وكلما شرّع مرة وسَنّ
من جيبتنا بيتموَل
تايتبدل عنّدو فنّ
وكيف ما بدّو بيتحوَّل
جَنّ وعَنّ وصوتو خَنّ
بتغيراتو الجنسيّة
_____________
كل عام بيتّمدد عام
وما قدرنا نغيّر ونشيل
نواب ونصنع أحلام
وجيل يسلّم تاني جيل
وتانمشي فشخة لقدام
ونصَحّح عنّا التمثيل
لازم نعمل للحكّام
فحص الخبرة النفسيّة
_____________
ما بيكفي مجلس نواب
بواقع تمثيلو ممسوخ
بيعمل كل ساعة سرساب
بيبرم فينا وما بيدوخ
كل شخص بيقرا بكتاب
وصار بدّن مجلس وشيوخ
معالي ، وشيوخ ، وألقاب
يزيدو شغل حرامية
_____________
ببلادي ضاع الأنسان
بين الجذر وبين المدّ
والطائف طاف وغرقان
بين الأمس وبين الغدّ
صار لازم نحمي العمران
ونتصرف مرة عن جدّ
ونتلبّنن مرة بلبنان
بأفكارو اللبنانيّة .
أنطوان إدمون أبوجوده
