لا شرعي ولا دستوري
قدّام الشعب المفجوع
حضورك عالجلسة ضروري
غيابك مرفوض وممنوع
لا شرعي ولا دستوري
____________
إبطال العدل بغايات
شخصيّة وضدّ القانون
وضع حدود ومحميّات
ما بتهدم للحق حصون
لازم تحضر عالجلسات
وين ما كنت ومين ما تكون
ولو كنّك ساكن بالذات
بقصر حكومي وجمهوري
____________
تفجير المرفأ إجرام
وتهديم شوارع بيروت
والأكتر نمنع أحكام
تصدر لمّا الشعب يموت
إعدام قتلتو الأحلام
وما تركتو للعالم قوت
وبالدولة تنكس أعلام
ودبلان الورد الجوري
____________
في أشرار ومش تجّار
سرقو خيرات بلادي
وعملو للسرقة أوكار
وتهريب بمعبر عادي
ما بيخافو شو ما صار
مش بالناقص بزيادة
شغلن ماشي ليل نهار
مهرّب لبناني وسوري
____________
نحنا الشعب المستمعين
كل يوم لنغمة جديدة
وبيحكونا المغتربين
بالكلمة وبالتغريدة
لبناني ومش ممكن لين
وطرقات صمودي بعيدة
مقهورين وتعبانين
وما بيلغي القهر حضوري
____________
البيطار وقبلو صوّان
جابو عالتحقيق شهود
حتى ما يضيع الإنسان
ويصير الظلم بلا حدود
لكن في عنّا بلبنان
مسؤول بسلطة موعود
فينا وبالكرسي طمعان
وبيعرقل كل أموري
____________
عرفنا عبّاس ابراهيم
ناجح واعي نضيف الكفّ
لكن ما منرضى التعتيم
أو يتخبّي خلف الصفّ
يا فهمي عنّا مفاهيم
ما منرضى عليها ينلفّ
لا بتبرير ولا بتعميم
ولا بالشرح الدستوري
أنطوان إدمون أبوجوده
