أحلام الحكّام
منغَطّي الأزمة بحرام ومنركض نعمل خِدّام
ساعة منخدم دين الخاص وساعة منخدم دين العام
————
لبناني وعايش مديون وعم أعطل هَمّ الليره
ما بهاجر لو مهما يكون وآخر همّي التأشيره
الأسعار بتطلع بجنون ومش رسميّة التسعيره
ديون بتركب فوق ديون وعالقهر منوعى ومنام
————
حكومة تصريف الأعمال تعطيل الدولة بالذات
منصة للسير وإقفال وصارت مهجورة الطرقات
وإهمال يعاقب إهمال ونيّات تحاكم نيّات
وما في شغل ولا أموال إلاّ بجيوب الحكّام
————
بتنزاد علينا الأقساط وأجرتنا هيي هيي
وفي أضراب بشهر شباط للهيئة التعليمية
صرخة أهل وجوّ عياط وكل ساعة في خبرية
وإحباط يرافق إحباط وطلاب بتخسر أيام
————
عدّاد الكورونا شاط بظل الأزمة المالية
وكل بدلة بدها خيّاط بالأمراض النفسيّة
بجولة مصر عملتو رباط بتشكيلات حكوميّة
والسيسي ما بيرفع باط وصعبة يدفشها لقدام
————
ياحكام الهَمّ كبير حيرتونا وما احترتو
أوضاع العالم تعتير وأنتو عالكَيف سهرتو
صارت موضة بشعة كتير كل شخص بيقتل مرتو
زاد العنف ومابيصير ببلادي يزيد الأجرام .
أنطوان إدمون أبوجوده
