أنا جايي أنا رايح.. أنا باقي كتّر القبايح!
أنا بأمري أنا الحاكم
آخر همّي المحاكم
أنا بقاصص أنا بحاكم
أنا بوزّع المغانم!
أنا صيرفة أنا الصرّاف
أنا بنحَر كلّ الخراف
أنا بخوّف أنا ما بخاف
أنا غوبلز أنا الصحّاف!
أنا حامي التجّار
أنا ريّس الفجّار
أنا 8 و 14 آذار
أنا الشريك والسمسار!
أنا بركّب الطرابيش
أنا بدفع البخشيش
أنا الأفندي أنا الشاويش
أنا بقلّك: نطور يا كديش!
أنا الدائن أنا المدين
أنا بقاضي أنا بدين
أنا بلعب بالبلايين
آخر همّي المودعين!
أنا بصرّف الدولارات
أنا بطبع الليرات
أنا خود أنا هات
واللي فات طبعاً مات!
أنا ملك التعاميم
بشلّحك آخر ملّيم
أنا بونزي أنا الفهيم
إسأل مجرّب مش حكيم!
أنا الشاري أنا البايع
أنا دولاري فايع
أنا عامل الفظايع
أنا مطيّر الودايع!
أنا شريك السياسي
أنا مقعّدهن عالكراسي
أنا الركن الأساسي
أنا بعمل يلّي براسي!
أنا بزعبر بالموازين
لحساب المسؤولين
أنا بلعّب الكشاتبين
عَ حساب المساكين!
أنا ما حدا قدّي
ويا أزمة اشتدي
أنا بجيب أنا بودّي
بوجّي يا مين يهدّي!
أنا جايي أنا رايح
انا باقي كتّر القبايح
أنا برشّ بهار ومالح
والصالح أكَلو الطالح!
انطوان ابوجودة
