إنتَ سَيِّد قرارَك 

1️⃣ إنتَ سَيِّد قرارَك

عَن حَقَّك إنتَ المَسْؤول

بْتِقْدِر تِحسُم خَيارَك

ما تِقْبَل تِبْقى مَعزُول

_____________

2️⃣ بِمَعرَكْة المَعارِك

إنْتَ رِكْنِ مْنِ الأركان

بْعُمران الوَطَن شارِك

صَوْتَك زِلزالُ وْبِركان

_____________

3️⃣ لِبنانِ الكَنزِ التَّمين

بْيِبقى المَنارَه بْهالشَّرْق

صَوْتِ الوَكيلِ الأَمِين

بْيِرعُد رَعْدِ.. بْيَعْمِل فَرْق

_____________

4️⃣ مَصدَرِ السِّلْطَه نِحنا

مْنِ الخِيانِه نْجَرَحنا

نِحنا الشَّعبِ لْ بيحاسِب

وْرَح نِسْتَرجِع فَرَحنا

_____________

5️⃣ بِالرَّشْوِه بْتِنْهانِ الرُّوح

وبتصير الكَرامِه تْنُوح

شْمُوخِ الأرزِه مْنِ شْمُوخَك

مِنْ إسْمَك عِطرا بيفُوح

_____________

6️⃣ خْتارِ النِّخْبِه بْحرِّيِّه

بْضَمير وْحِكْمِه وْإيمان

شِبْعِتِ الجُمْهُوريِّه

مِنْ قَهْرُ وْظِلْمُ وْحِرمان

سيمون حبيب صفير