الحد الأدنى البهدلة
صرنا من أفقر بلدان
فوضى وأزمة حكوميّة
وبالحد الأدنى الإنسان
صار يتبهّدَل يوميّة
____________
حجم الفقر وحجم الدين
مش بالليرة بالدولار
ومين بيعرف نحنا وين
ومكسورين بكم مليار
وأكتر من شخّص وشخّصين
خلو دولتنا تنهار
وأكتر من سعر وسعرين
للدولار بنفس نهار
بسرعة بيطلع شي ألفين
وعا مهلو بينزَل ميّة
____________
لبناني وقاعد بالبيت
وصارت عيشتنا بلا طَعم
صار همّو يحصلّ عالزيت
وشي غالون بسعر الدعم
لو كنّو عايش أو ميت
في مسؤول بيزعم زَعم
وبيقول تعبت وضحّيت
بتصريحاتو اليوميّة
____________
كل شرط مقابيلو شروط
وصرنا التعطيل نحلِّل
وبين الضاغط والمضغوط
كيف بدّو الشعب يكمِّل
منلعب بالحلّ ومنشوط
ومن أزمتنا منقلِّل
والعقدة منغزلها خيوط
بتشكيلتنا الوهميّة
____________
وبيقولو الجاني مجهول
وما منعرف وين صار الحلّ
والحاكم عنّا مشغول
وسيف الفتنة بإيدو سَلّ
بيحكي وكلما الشرح يطول
ويمكن من حالو ما ملّ
وموقف ما بيعطي وبيقول
غير بلهجة فوقيّة
____________
وضع المستشفى بالويل
وعليها ما فينا نفوت
لولا دخلنا بنصّ الليل
يمكن من جلطة منموت
وهارون بيصرخ من ميل
وما بيعطينا دقيقة سكوت
وبالعالم مقطوع الحيل
من الأوضاع الصحيّة
____________
كل جهة بتعطي إنذار
وموقف سلبي بتأَيد
وآذار الشهر الغدّار
مش تارك شخص يعَيّد
كل يوم منسمع أخبار
وفيها ما شفنا الجيَّد
وكيف صارت فينا تنهار
أوضاع الجمهوريّة
أنطوان إدمون أبوجوده
