الله يعين الفاتيكان عَ موارنة لبنان!
![](https://www.addabbour.net/wp-content/uploads/2024/06/0000-1-26-.jpg)
حضر الموفد البابوي إلى بيروت بهدف المساعدة على انتخاب رئيس لكنه غادر خالي الوفاض بعدما لم يتمكن من جمع الأقطاب الموارنة الأربعة حول طاولة واحدة من أربعة أرجل! فالتقى بهم رجلاً رجلاً! فكل رجل من بينهم يتمرجل وعن كرسيه لا يترجّل!
ومتل ما بيقول المثل اللبناني “تيتي تيتي متل ما رحتي متل ما جيتي!” بارولين ضاع بكشاتبين المتزعّمين! مع سامي تنظير بالمناظير ومع سمير تعتير بالقناطير! مع سليمان هو البطرك كمان! ومع جبران طرقو فرمان! والرئاسة بخبر كان! التيار ردّ عالقوات والقوات ردّت عالمردة! والمردة ردّ عالكتايب والكتايب ردّت عالتيار! ومين اللي فتح الردّة؟! وهدّي كان فيك تهدّي! بيّي أقوى من بيّك! وعمّي أقوى من جدّك! هيدا ضهر هيداك فات! جمهورية ضرَبها الخوات! شي مرشّح شي مشرشح! واحد مزكّم تاني بيتفّ بلغم! تالت بيعطّس رابع من الضحك بيفطّس! الكرسي ضرَبها الفراغ وما فيها ولا إجر صاغ! لبنان ضاع واللبناني جاع والرئاسة بالقاع والكرسي تناتشتها الضباع! والله يعين الفاتيكان عَ موارنة لبنان!