بين الحاكم والمحكوم
بأوضاع الليرة احتارو
بسوق الصرف وأسعارو
وشو بيعمل مصرف لبنان
لمّا ينشّف دولارو
______________
بين الحاكم والمحكوم
في مصرف عم يتحكّم
وبالوضع المالي المأزوم
مين لقادر يتكتّم
ومن عجز الدين المرقوم
إفلاس الدولة تحتّم
وكلما منسأل مش مفهوم
حقوق العالم وين صارو
______________
أنتو قتلتو حلم الناس
وما حملتو حتى بالنعش
وإنذار اندقو الأجراس
وما عملتو إسعاف ونعش
خناقة بحكومة ريّاس
لا عشرين ولا تمنتعّش (١٨)
ولا قدرتو قيستو قياس
ولا التركيبة تختارو
______________
يا سعد و ياعون كتير
تأخرتو وسكرّتو الباب
عالحلّ وحال التعتير
أحوال اللبناني صاب
فقر وإضراب وتوتير
وبين كذّاب ومش كذّاب
عملتوها حفلة تشهير
كلّ واحد مع زوّارو
______________
يا حكّام الأزمة عيب
تكفّو وتزيدو الخبطة
وتعيشو الواقع بالريب
وعالعنق تشدّو الربطة
ويمكن ما نلاقي بالجيب
معنا حق خبز وربطة
ونحنا حفظناكم عن غيب
وكيف علينا بتتبارو
______________
أجور العمال بتنهار
وانشالله اللقمة نشبَع
وبين الليرة والدولار
في حرب وحرب بيتبَع
وفي اشخاص كبار زغار
بأرزاق الناس بتربَع
وبالشر بتبني أوكار
وهدّو للخير ديارو
______________
بكل مصرف في منتفعين
وما منعرف كيف الصفقات
والأموال الموضوعين
ما بينطالو بسحوبات
وبدفاتركم محجوزين
وما بينصرفو بالشيكات
غير ما يصيرو موجودين
بين البنك وسمسارو
أنطوان إدمون أبوجوده
