حكومة العيد !!
حكومة بالمصالح عرقلوها
وتاتخلق بعد فرصة ما عَطوها
وياربي هيك ماتكون الهديّة
إذا عالعيد قدرو يصدروها
فيها وجوه فهم وعبقريّة ؟
من الأقطاب قطبة قطبوها
ما في لزوم تبقى منطقيّة
اذا عا قياس جسمن قيسوها
المهم تكون تجمع أكتريّة
وجماعة بس هيئة استوزروها
تا نرضي فروع كل الطائفيّة
أو حتى الكراسي يجلسوها
الكفاءة مش برامج منطقيّة
ولا مفروض حتى يطلبوها
الوزارة تكون تعمل شعبويّة
حتى للزعامة يناصروها
مش مفروض تخدمنا سويّة
وأساس الحكم ناس بيحكموها
على التفريق بسياسة شقيّة
ومصالح للوطن ما بيخدموها !
يا دستورنا أنت الضحيّة
بنودك كل ساعة غيروها
نسيو وين في عنّا قضيّة
حكّام الكراسي لبهدلوها
التنوع كان متل المزهريّة
زهرة حد زهرة زينوها
عملوها مزارع مذهبيّة
وإلا سمّ أصفر ما سقوها
وصارو يفرّزوها عالهويّة
حتى للمغانم يقسموها
صارو يعلفوها من عشيّة
يفيقو الصبح حتى يدبحوها
وعملوها موائد بلطجيّة
ريشة بعد ريشة ينتفوها
حكومتنا العتيدة والقويّة
شوي شوي عم بينفسوها
علّوها منابر عنتريّة
ومواقف بالنميمة حرّكوها
ومتاريس بشعة وبربريّة
بوج الحل صارو يمترسوها
وإجا ماكرون وفرنسا الأبيّة
عملو مؤتمر ما ساعدوها
ودولار لكان ألف وخمسميّة
طار من المصاري لحولوها
وحطّو بالبنوك الأجنبيّة
ومال الناس ما بيسحبّوها
الحلول تأجلت بدها رويّة
الحصص حتى منيح يحصحصوها
الولادة للحكومة قيصريّة
أذا اتفقوا عا توزيع المغانم
بيصيرو للحكومة يشكلوها .
أنطوان إدمون أبوجوده
