عشّاق السلطة بلبنان
عشّاق السلّطة عِنّا حَبّو المال بموطنّا
وللكرسي بيبقو عشاق نكاية بكل واحد مِنّا
—————–
عيد الحُب بيبقى بعيد
انكانو هنّي موجودين
والراس لمتل الصنديد
كيف بدّو يحطّ قوانين
والقلب لجوّاتو جليد
ما بيعرف خفقات يزين
بيعرف من أول وجديد
كيف علينا بيتجنّى
—————–
جرّبنا نطبّق قانون
ونكفّي كلّ التحقيق
بتفجير المرفأ ونكون
للعدل شهود وما نطيق
الظلم ونحنا الحقّ نصون
بدولة ما فيها مواثيق ،
بيطلع كلّ عاقل مجنون
وكل ظالم شخص تبنّى
—————–
منعرف بالقاضي صوّان
عندو الجرأة موجوده
وبإيدو حامل ميزان
العدل بغاية منشوده
رجعنا ولقينا لبنان
بظلّ الأزمة المشهوده
وصعبة يتخطّى الأحزان
وبأوضاعو يتهنّى
—————–
ياريت بكل الجلسات
عنّا خطة مرسومي
وما نعرف عملو نكايات
بين المجلس وحكومي
أو حتى تطلع أصوات
متل البومي مشؤومي
وما نعيش بذات المأساة
وفينا الواقع يتدنّى
أنطوان إدمون أبوجوده
