فقر وموت وتسلاية
رجعنا من أول وجديد
ناخد ونحطّ مواعيد
نلعب ونخلّي الدولار
فقر وموت الناس يزيد
____________
بقيتو بمهلة تسع شهور
والتشكيلة تسلاية
والشعب الصامد مقهور
بين الرايح والجايي
وتايتحمّل مش مجبور
ويقضّيها ترجاية
وبين بيوت وبين قصور
كل يوم بيسمع تهديد
____________
تشاورتو بالماضي بقصر
حتى تسمّو شخصيّة
من بعبدا أعلتنو النصر
تحلّو أزمة حكومية
عصرتو جيوب العالم عصر
والتشكيلة مخفيّة
مع إسم بيحصرها حصر
وبيحطّ شروط وبيعيد
____________
منرجع نتسلّى ومنقول
منطنّش لو بدنا نعيش
ومنغطي الغلطة بحلول
موجودة تحت طرابيش
بيمشي وبيعرّم مسؤول
وبيدفش غيرو تدفيش
والوضع المالي مشلول
والحلّ اللبناني بعيد
____________
الحشد الشعبي بالساحات
صار لازم يتحدى الحكم
ويقاوم سوء الغايات
وليش منبقى صمّ وبكمّ
حاكمتونا عالنيّات
ومش صادر بالعدل الحكم
الحقّ بيطلع عالأموات
ومنكم ما في شخص يفيد
____________
تحكمتو برقاب الناس
وما فينا المرضى نداوي
ودَقّو بالحزن الأجراس
والشرّ علينا ناوي
وانتو لبستو أحلى لباس
وفي بطن بيغفى خاوي
حملتو المال كياس كياس
وهربتوها بالتأكيد
____________
غاب الحلم وضاع الأصل
وعالعتم بتغفى بيروت
عملتو فينا أبشع فصل
وتركتو الأطفال تموت
ونحنا غير ما ندفع وصل
ما نقدر مستشفى نفوت
وإبرة ما بتنشك ومصلّ
غير ما الدفعة تكون بالإيد
أنطوان إدمون أبوجوده
