لطَشوا الفول وطيّروا فيول!

انتهت مسرحية “الثقة والثقالة” اللي عُرضت على خشبة مسرح ساحة النجمة في صالة بار- لمان آخر زمان! من بطولة فرقة نواف والـ 23 وإخراج النبيه والكومبارس الـ 127! وكتروا الحكواتيي لأنو في نقل مباشر عالهوا! وخود عَ أكل هوا! وبعد سنة في انتخابات نيابية! للتجديد للطبقة المهترية! لايحة بتعرف كيف بتبلّش وما بتعرف أيمتى ووين بتخلص! ومن هالطقم ما رح نعرف نخلص! والإستيذ قرر يختصرها توفيراً للوقت! وللمازوت! لأنو كهربا ما في! في فيولة بسّ ما في فيول! اعتكفوا النوائب! واستفاقوا من نومن النوّام! وضاعوا بين الأفلام والأوهام! شي زعلان لأنو ما خلّوه يطرق فرمان! شي عم يتسلّى عالهاتف! شي وجّو ناشف! شي حالو شايف! شي بنومو باصر كوابيس! وشي حط بحصة لأبليس! سلام أخَد ثقة أكثرية الريّاس! مع إنن فاقدين ثقة الناس! أقلية حجَبوها عن نواف! لأنو ما عطاهن حصّة من لحم الكتاف! وكل مين بيشدّ لصوبو اللحاف! ونواف مصدّق حالو! مفتكر أبو زيد خالو! وخلص فصل من فصول الطقم المفصول! وما تقول فول تيصير بالمكيول! المسؤول لطَش الفول ولبَط المكيول وطيّر عالمواطن فيول!

انطوان ابوجودة