من 50 سنة: الدولة ما فيا مافيا المجارير!
من 50 و60 سنة الدولة فيا وما فيا: فيا ريغارات مغطّاية روسها وما فيا روس مغطّاية بالريغارات! فيا جوَر صرف صحّي وما فيا جوَر صرف مصاري! فيا ريحة سياسة وما فيا سياسة طالعة ريحتها! فيا أعمال بلدية وما فيا بلدية تواطؤ وإهمال! فيا بلدية بتحترم أهلها وحالها وما فيا بلدية أبو زيد خالها! فيا نوّاب واعيين وما فيا نوّام نايمين! فيا ناس بتنزل عا بحر نضيف وما فيا بحر مجارير بيطلع عالناس! فيا مين يحاسِب ومين يتحاسَب وما فيا مين يحسُب وعا مين مَحسوب! فيا ميّ بتنزل شبر وما فيا دولة بتغرق بشبر ميّ! فيا مسؤول بيتحمّل المسؤولية وما فيا مسؤولية بيضيّعها المسؤول! فيا ريغار حيطانو باطون وما فيا ريغار مسكّر بالباطون! فيا دولة فاتحة المجرور وما فيا مجرور مسكّر الدولة! فيا دولة بتفعل وما فيا فاعل أقوى من الدولة! فيا سلطة رافعة راس لبنان بالعالي وما فيا سلطة غرقانة لدينَيها بالمجارير! فيا قضاء قادر يحاسب وما فيا قضاء وقدَر! فيا إعمار وما فيا مجلس قاصف الأعمار! فيا فيضانات من فوق وما فيا فيضانات من تحت! فيا أملاك بحرية لأهل لبنان وما فيا أملاك بحرية بلَعتها الحيتان! فيا الرملة البيضا وما فيا الرملة السودا! فيا مجارير ريحتها دولارات وما فيا دولارات ريحتها مجارير! فيا أو ما فيا مجارير بس عالأكيد ما فيا مافيا المجارير! من 50 سنة الدولة فيا وما فيا مجارير! اليوم المجارير فيا الدولة!
انطوان ابوجودة
