50 سنة الى الوراء: فيا وما..فيا!

ما بتعجبني اسرائيل اللي كل ما دقّ الكوز بالجرّة أو دقّ الغاز بالنفط بتهدّدنا بإعادة لبنان 50 و 60 و 70 و 80 سنة الى الوراء! لكن اللي بيعجبني أن من إيجابيات هالعودة إن تمّت!

فيا وما فيا: المنطقة من 70 و 80 سنة ما فيا اسرائيل! الجمهورية من 50 و 60 سنة فيا تيار كهربائي 24/24 ، 110 مش 220 وبلا جميلة الـ 30 ولا الـ 128! وفيا مياه 24/24 وبتنشَرب من الحنفية! وتران عَ السكّة! مش سكّة بلا تران بدولة ما فيا إلاّ ترانات بالجملة! فيا شرطي سَير إلو هيبة والدولار بليرتَين وبحر نضيف والشط للناس مش للمافيات! وهوا نقي، و 75% مساحات خضرا! فيا الليطاني اللي كان حلم اسرائيل! وما فيا الليطاني اللي صار رمز عزرائيل! ما فيا خضار ملوّثة بمياه المجارير! ما فيا زبالة عالطرقات ولا مكبّ برج حمود ولا مطمر الكوستابرافا! ولا مكبّات عشوائية ولا مطامر نفايات سامة! ولا محارق ولا سرطانات! وما فيا زحمة سَير ولا “خازوق” نهر الموت ولا “زاموق” جل الديب! وما فيا حرائق ولا مشاحر! وما فيا سوكلين ولا اخواتها ولا ورثتها! وما فيا فاتورتين كهربا وتلاتة ميّ واربعة تلفون! وما فيا انترنت متل الزلحفة! فيا سلاحف أسرع من الانترنت! ما فيا خلوي ولا خروي! ولا واتساب ولا حوادث سَير بسببو! ما فيا تلفزيونات بتسبّ بعضا! فيا تلفزيون لبنان وحدو هو والأنتين! وما فيا فساد ضارب طنابو! وما فيا صفقات بالمليارات! وما فيا مافيا سلاح ولا مافيا دوا ولا مافيا موتورات! ولا مافيا بواخر! ولا مافيا فيول ولا مافيا فيولة! ولا مافيا فانات! ولا مافيا كسّارات! ولا مافيا نفط ولا مافيا شفط! وما فيا 14 ولا 8! وما فيا آذاريين ولا أيّاريين! ما فيا حبال غسيل سياسية وسخة! فيا حبل مشنقة! من50 سنة الجمهورية فيا دولة! اليوم الدولة مافيا الجمهورية!

انطوان ابوجودة