دولة حصريّة
ما حملّتو التوكيل منيح
بالندّوة التشريعيّة
برّي بيبقى وما بيزيح
بتركيباتو الحصريّة
___________
جلسات النوّاب اليوم
الأزمة ما فيها تعافي
اللبناني عايش بالصوم
القسري وجرحو مش شافي
اسمالله فقتو بعد النوم
والواعي فيكم غافي
وبدولتنا انتو دَوم
بهدلتو المسؤولية
___________
تمترسّتو خلف القانون
وعملتو ردّ وإبطال
ساعة فنون وساعة جنون
حتى الجاني ما ينطال
ما مندفع للغير ديون
وبالبنك منسرق أموال
منخفي المطلوب وبيكون
بين أحضان الشرعيّة
___________
يا ريّس مجلس نوّاب
صرلك عا هالكرسي سنين
رجعتو وفتحتو الأبواب
وتلاعبتو بقوانين
عشقتو بالدولة الألقاب
وضيعتو كتير ملايين
من مال الناس وأتعاب
أرزاق اللبنانيّة
___________
لو بتخلّي لغيرك دَور
بتريحنا وبترتاح
بتترك مطرقتك عالفَور
كل شي جمعنا معكم راح
عليتو متل خيال الحَور
وما حميتونا من الأرياح
سياسة فقر وقمع وجَور
وحساباتك شخصيّة
___________
ويا ريّس طوّل بالك
بعهدَك باقيلك كم شهر
ما بتقدر تقشع حالك
وكل يوم بأزمتنا دهر
في ناس وشعب قبالك
ميت عاش سنين بقهر
ولو ما توصل أحلالك
عا راس الجمهوريّة
___________
ويا ميقاتي تحملّناك
وما بدنا نعود نشوفك
لا بالمطعم أو بسناك
مش بيضا سودا كفوفك
بالماضي إنت عرفناك
ومكفّينا بمعروفك
آخد قرض وما مننساك
بالصفقة الإسكانية
___________
ويا جعجع حاجي تنظير
تسلملي تحليلاتك
في عندك سوء التقدير
بيسيطر عا جولاتك
وجبران بحلم التغيير
مش أحسن من وقفاتك
لا تحسين ولا تدبير
ولا خطة إصلاحيّة.
أنطوان إدمون أبوجوده
