الدّب الروسي بوتين
مش مع بايدن أو بوتين
بالحرب الأوكرانيّة
مع شعب معترّ مسكين
بتجربتي اللبنانيّة
____________
الدب الروسي عالأطفال
هاجم والحجة الناتو
بدولة أضعف صال وجال
بكل دعسة عالم ماتو
مش قادر يخفي الأفعال
ولا مقبولة جولاتو
يوقف شعب ضعيف قبال
الدبّابات الروسيّة
____________
القيصر مات وحلمو غاب
وراح الحكم السوفياتي
لا تتأمل بعد غياب
نشوفك يا ميّت آتي
منتفهّم يمكن أسباب
الجيرة والأمن الذاتي
وما منتفهّم شرع الغاب
والضربات الوحشيّة
____________
يا زيلينسكي بقلّك ليش
صَدّقت الامريكاني
والأحلاف بخوف وطيش
نسيو الشعب الأوكراني
وحدك صرت وضاق العيش
حدود بلادك فلتاني
مش باقي غير شعب وجيش
يستشهد للحريّة
____________
ما بينفع دعم الأسواق
ولندن تطمين بتهدي
بأوهام بتحمي الأعناق
وما فيها الحرب تهدّي
بولندا فكٍت الخناق
عم تستقبل وتودّي
وفرنسا بتهدي أشواق
من السوق الأوروبية
____________
نحنا تجرّبنا بلبنان
من سنة الخمسة وسبعين
السوفياتي والإمريكان
علينا كانو متفقين
هديونا بدل الجولان
للسوري وللمحتلّين
بعنف وغزوات الجيران
بالحرب لمش أهلية
____________
عملونا ساحة للخرق
وما عرفنا كيف نتعافى
ونحنا منرفض نطلع فرق
لتل أبيب أو يافا
حرقونا بالماضي حرق
وما خلّونا نتصافى
وتحملّنا كلّ الشرق
بأزماتو الإقليميّة
____________
حملو علينا كلاشنكوف
ولبسو أبشع كوفّيات
ومرّة ما عملو معروف
ولا حملو سلم الرايات
ولولا بيرجع غورباتشوف
ويلمَح قصف الطيارات
بيبكي كلمّا الروسي يشوف
بيغتال الإنسانية
