حكّام الجمهوريّة
لبناني وصاير مخجول
بدولتنا اللبنانية
كلما يشدّو فيها نزول
حكّام الجمهورية
——-
مفرد أو مجوز يا عين
يا فهمي شو هالخطّة
علينا بتتمرجل والدين
حدود الأشخاص تخطّى
بتزرع حاجز عالميلين
ونحنا الشعب منتلطّى
وكل يوم بتعمل ألفين
محضر بعد الدوريّة
———-
كلّ الأطراف بلبنان
اصطادو بالميّ العكره
وكلما بيصرّح إنسان
بيعارض غيرو الفكره
لا عمران ولا بنيان
وكل بكرا بعدو بكرا
بكلّ وعد بيظهر شيطان
بأفكارو الشيطانية
———
تحاصصتونا يا حكّام
وياريت قبلتو فينا
ونفذتو حكم الإعدام
وما سمعتو لما حكينا
بكل حلّ زرعتو ألغام
بيطلع لو نحنا مشينا
وعيشّتو الشعب بأوهام
وتشكيلات حكومية
———
ما نسينا وياعيب الشوم
شو عملتو بالحريات
منغرق فيكم مامنعوم
ان حاكمتونا عالنيّات
ظرف اللبناني المشؤوم
بيتدهور فيكم بالذات
وصوت بينعق متل البوم
كلما بتحكو يومية
——–
شوفو اللبناني وين صار
ما بيسمع غير البومي
كلما بتحكونا بأفكار
بأزغر كلمة ملغومي
تشاطرتو متل الشطّار
ومين بدّو يشوف حكومي
وأنتو عالكرسي تجّار
للغايات الشخصيّة
أنطوان إدمون أبوجوده
