سير التحقيق
بتفجير الرابع من آب
استشهد للعالم أحباب
وبيوقف سير التحقيق
كل مرّة بمجلس نوّاب
______________
ما شفتو كيف كان الردم
فوق الناس المظلومين
واستمتعتو بمشهد هدم
بيوت الأهل المنكوبين !
ما عشتو حالة من الصدم
يا حضرات المسؤولين
وعدمتونا أنتو عدم
ودفنتونا تحت تراب
______________
أنتو يا نوّاب العار
وقفّتو سير التحقيق
مع صوّان ومع بيطار
وكيف بدّو المظلوم يطيق
نايب غايب عن أنظار
وبالأزمة ما كان رفيق
بيعرف وبيخفي أسرار
وبيبرم متل الدولاب
______________
حلم اللبناني مفقود
بدولتنا اللبنانية
وصعبة بعد الغيبة يعود
بتشكيلة ميقاتيّة
للتأليف عملتو بنود
مش معروفة وهميّة
وصرنا بدولة مش موجود
فيها لا عدل ولا كتاب
______________
وسمعنا مبارح رفّول
صار يحكي ويزيد الشرح
يهاجم ميقاتي وبيقول
ما بيمشي معنا هالطرح
بالموقف منّو مسؤول
وبالكلمة عم يجرح جرح
يهاجم ويهاجم عاطول
وما بيحسب للغير حساب
______________
في مركز واحد معروف
مع كل عهد بيتوالى
بيختار الكلمة وحروف
وبالألفاظ بيتعالى
تلاتي بيحكو بكل ظروف
وبيكفي وحدو شلالا
وحاجي تزيدو بالمصروف
وللهدر تلاقو أبواب
______________
ثورتنا ثورة محروم
ثورة إنسان وفلّاح
وحكم الظالم ما بيدوم
ولو عندو من الغير جناح
تعبنا من الجوّ المسموم
وبالحرب خسرنا أرواح
ويمكن ما نلاقي محكوم
بالحبس وعن جرمو تاب
أنطوان إدمون أبوجوده
