ناس ودولة بالمجهول!
صرنا بحالة إستنزاف
لا قوانين ولا أعراف
ودولة بتمشي عالمجهول
وبالصف الشعب بيوقاف
____________
بكل أزمة في مقهورين
وبتصرف من مال الحيّ
ونحنا منبقى مصطفين
بشارع ضيّق أو بالحيّ
فضيو رفوف ومحتكرين
ما خلّو عليها و لا شوي
وبالدولة فتحو دكاكين
سرقة ومعروفة الأهداف
____________
دكّان السلطة مفتوح
حتى يزيدو المنتفعين
بكل صفقة سرقة بتفوح
عاحساب الشعب المسكين
لا مقبول ولا مسموح
عنا نلاقي جوعانين
وناس بتبكي وعالمفضوح
وبتاكل لقمتها حاف
____________
لو شكلّنا حكومة اليوم
طقم سياستنا مهلهل
نحنا شعب وأعظم قوم
ومن ماضي حرّ تأهل
كيف منرضى نخلّي دَوم
سلطة وحكم بيتمهل
مش مسؤول وحَب النوم
عالكرسي وشعبو ما شاف
____________
ببلادي من جيل لجيل
ورتنا دولتنا مزارع
وما بتنفَع حفلة تجميل
لو بدنا بحجّة نقارع
مش تعطيل ولا تشكيل
لازم للثورة نسارع
وهالسلطة الملعونة نشيل
وما نعود من الآتي نخاف
____________
مين بدو يعمّر بيروت
وانتو حكمتوها إعدام
مش باقي نور ولا بيوت
بيدخلها بليل الأحلام
من الأيتام سرقتو القوت
أنتو يا أبشعّ حكّام
علينا بتختلفو ومنموت
لو مرة عملتو أحلاف
____________
عملتو بالدولة مشاريع
بنهب الخاص ونهب العام
ما بيكفي تعميم نذيع
وبالمصرف نصدر أحكام
مش ترقيع و لا تطويع
بتنحلّ الأزمة بإيام
وثروة ناس ومال يضيع
بسرقة مكتملة الأوصاف
أنطوان إدمون أبوجودة
